Datblygu’r cynllun benthyciadau bach sy’n gwneud gwahaniaeth mawr.
Cyfle i gymunedau Gwynedd a Môn beilota modelau buddsoddi lleol yn eu hardal.
Mae Arloesi Gwynedd Wledig ac Arloesi Môn, dau o gynlluniau Menter Môn, wedi cyhoeddi eu bod yn ehangu eu prosiect ‘buddsoddiad mewnol’ i sawl ardal newydd ar draws Gwynedd a Môn.
Nôl yn 2015 sefydlwyd Be Nesa Llŷn – cronfa benthyciadau di-log i bobl ifanc Pen Llŷn gychwyn neu ddatblygu busnes neu fenter gymdeithasol yn yr ardal. Buddsoddodd 11 o bobl busnes Llŷn eu harian yn y gronfa, sydd erbyn hyn wedi cael ei ailgylchu drosodd a throsodd, nes bod 15 busnes a menter gymdeithasol wedi derbyn gwerth dros £70,000 o fenthyciadau di-log ganddynt. Roedd y benthyciadau hyd at £5,000 yn helpu tuag at brynu offer, costau hyfforddiant, marchnata a llogi gofod i weithio.
Un sydd wedi buddsoddi yn y gronfa yw Geraint Jones, Becws Islyn:
“‘Da ni isio trio gwneud gymaint a gallwn ni i’r gymuned a chadw pobl ifanc yma… sa ni’n cael mwy o bobl ifanc yn dechrau busnesau eu hunain yma bysa mwy o arian yn aros yn y pentrefi wedyn. Mae’n amser da i bobl busnes rhoi arian mewn a helpu pobl ifanc i ddechrau.”
Mae’r cynllun wedi galluogi nifer o bobl ar draws Llŷn i gychwyn busnes er mwyn gallu byw a gweithio yn eu milltir sgwâr, gan gynnwys Tanya Whitebits, Wyau Llŷn a Tylino.
“Mae’r benthyciad wedi helpu yn fawr iawn hefo’r busnes – mae o wedi helpu fi
ddatblygu’r busnes o ran refeniw… dwi’n gobeithio neith o ddatblygu a rhoi cyfle i rywun arall lleol ddechrau busnes eu hun hefyd.” Rebecca Hughes, Tylino
Mae’r gronfa ar gael i fentrau cymdeithasol hefyd. Defnyddiodd Clwb Hoci Pwllheli cyllid o’r gronfa i brynu llifoleuadau ar gyfer y cae:
“Oedd y broses yn ofnadwy o hawdd, a gath ni lot o gyngor. Heb yr arian yna byswn ni ddim hefo’r llifoleuadau yma heddiw – ac mae hynny wedi galluogi ni i fwcio’r cae allan. Mae ‘na lot o bethau’n mynd ymlaen rŵan a bydda’r holl bobl ddim yn cael mynediad i’r cae yma heb y gefnogaeth yna.”
Yn dilyn llwyddiant cronfa Be Nesa Llŷn a nifer o ymholiadau o du hwnt i’r ardal, mae Arloesi Gwynedd Wledig ac Arloesi Môn am ariannu a sefydlu nifer o gronfeydd newydd sbon i gymunedau ar draws y ddwy sir. Mae galwad nawr i gymunedau eraill yng Ngwynedd a chymunedau Môn wneud cais i fod yn rhan o’r cynllun. Mae ffurflen gais ar gael yma i geisio neu am fwy o wybodaeth cysylltwch â betsan@mentermon.com cyn 11 Gorffennaf 2022.
Darparwyd cefnogaeth ariannol ar gyfer rhaglenni Arloesi Gwynedd Wledig gan Lywodraeth Cymru a’r Gronfa Amaethyddol Ewrop ar gyfer Datblygu Gwledig drwy Gymunedau Gwledig Llywodraeth Cymru – Rhaglen Datblygu Wledig 2014-2020, yr Awdurdod Dadgomisiynu Niwclear, Cyngor Gwynedd ac Ymddiriedolaeth Elusennol Ynys Môn.


Dysgwch fwy am yr hyn rydyn ni’n ei wneud...



01248 725 700

Menter Môn Cyf, Neuadd Y Dref Llangefni, Sgwar Bulkeley, Llangefni, Ynys Môn LL77 7LR

Menter Môn Cyf, 146 Stryd Fawr, Porthmadog, Gwynedd LL49 9NU

Rhif Cwmni: 3160233