Mae mis Rhagfyr yn fis llawn gweithgareddau cymunedol. Gwych oedd gallu cyfrannu at drefnu a chefnogi llawer o gymunedau i gynnal digwyddiadau a gweithgareddau Nadoligaidd yn ystod mis Rhagfyr eleni.
Yn ystod y mis, roedd amrywiaeth o ddigwyddiadau a gweithgareddau i deuluoedd a chymunedau a gafodd gefnogaeth gan ein cynllun Balchder Bro, gan gynnwys:
- Gweithdy crefftau Nadoligaidd yn Llannerch-y-Medd, cyfle i greu addurniadau traddodiadol a rhannu syniadau creadigol.
- Groto Sion Corn Cymraeg yng Nghaergybi a Llangefni
- Ffair Nadolig a Groto Sion Corn yng Nghanolfan Hen Ysgol Bodorgan
- Goleuadau Nadolig Llangefni, dathliad hudolus gyda cherddoriaeth fyw, stondinau lleol a Siôn Corn yn croesawu plant.
Roedd y digwyddiadau hyn, a nifer o rai eraill, yn gyfle i bobl ddod ynghyd a chreu atgofion Nadoligaidd mewn awyrgylch cynnes a chroesawgar.
Bwriad Balchder Bro ydi dod â chymunedau ar draws Ynys Môn ynghyd gan greu cyfleoedd i bobl gymdeithasu a chymysgu mewn naws Nadoligaidd. Cawsom gyfle i wneud hyn ym mis Rhagfyr gan atgoffa pawb o bwysigrwydd cymunedau arbennig ac unigryw. Roedden ni hefyd yn falch bod y digwyddiadau yma yn rhoi cyfle i drigolion lleol ddefnyddio’r Gymraeg yn y gymuned.
Mae’r gweithgareddau hyn yn rhan o’n gweledigaeth ehangach ym Menter Môn sef datgloi potensial ein pobl gan gynnwys ein cymunedau a sicrhau bod y Gymraeg yn ffynnu.
Dywedodd Huw Jones, Rheolwr Cynlluniau Cymunedol Môn, yma ym Menter Môn:
“Ein nod ydi ysgogi trafodaeth am yr hyn sy’n gwneud pobl yn falch o’u cymuned a galluogi syniadau i ddod yn fyw, ac wrth gwrs rhannu ysbryd y Nadolig!”
Gwybodaeth pellach am Balchder Bro:
Mae Balchder Bro, dan arweiniad Menter Môn ac wedi’i ariannu gan Gronfa Ffyniant Gyffredin Llywodraeth y DU, yn rhaglen sy’n grymuso cymunedau i wireddu syniadau sy’n hybu balchder lleol. Gall hyn fod yn ddigwyddiadau, prosiectau celf, gardd gymunedol neu weithgareddau sy’n hyrwyddo’r Gymraeg a hunaniaeth Ynys Môn. Mae’r cynllun yn cynnig cefnogaeth ariannol ac ymarferol i grwpiau, gan roi hyder i bobl wireddu eu syniadau.
